24.08.2016. Ўзбекистон Республикаси давлат мустақиллигининг йигирма беш йиллигини муносиб кутиб олиш, ходимларга байрамона кайфият улашиш мақсадида жорий йилнинг 20 август куни “Чинобод” санаторийсида Ўзбекистон касаба уюшмалари Федерацияси томонидан ходимлар ўртасида “Заковат” телевизион интеллектуал турнири ўтказилди.

“Ўзбекистон” телерадиоканали орқали эфирга узатиладиган “Заковат” интеллектуал кўрсатуви билан ҳамкорликда ўтказилган мазкур телевизион турнирда турли касб эгаларидан иборат жамоалар ўзаро билимда куч синашди.

Дунёга машҳур “Брейн-ринг” интеллектуал ўйини шаклида ташкил этилган ўзига хос ақл-заковат жангида жами 12 та жамоа, яъни тиббиёт соҳаси вакилларининг “Авиценна”, авиация ходимларининг “Юксак парвоз”, машинасозлик саноати вакилларининг “Машинасозлар”, банк ходимларининг “Ёш банкирлар”, таълим соҳаси вакилларининг “Интеллект”, темир йўл соҳаси ходимларининг “Локомотив”, ахборот технологиялари ва оммавий коммуникация ходимларининг “Алоқачи”, архитектура ва қурилиш соҳаси вакилларининг “Бунёдкор”, нефть-газ соҳаси вакилларининг “Аланга” ҳамда тадбиркор ва фермерлар жамоалари иштирок этди.

Шунингдек, телевизион турнирда “Заковат” интеллектуал клубининг тажрибали билимдонларидан иборат иккита жамоа ҳам ходимлар жамоаси билан тенгма-тенг беллашди.

Ҳар бир баҳсда жамоаларга турли соҳа ва йўналишларга оид 4 тадан қизиқарли ва мантиқий саволлар берилди. Жамоалар мазкур саволларга 20 сония вақт ичида ечим топиши ҳамда махсус тугмани рақибларидан олдинроқ босган ҳолда, жавоб бериши талаб этилар эди.

Турнир давомида барча соҳа вакиллари ғолиблик учун кескин кураш олиб боришди, шу сабабли ҳам ҳар бир баҳс шиддатли кечди. Ярим финалда нефть-газ соҳаси вакилларининг “Аланга” жамоаси темир йўл ходимларининг “Локомотив” жамоаси устидан қўшимча саволларда қўлга киритилган очко эвазига ғалабага эришган бўлса, “Заковат” билимдонларидан иборат икки жамоа ўртасидаги баҳсда Жобир Аҳмедов сардорлигидаги жамоанинг қўли баланд келди.

Қизғин кечган финал баҳсида турнирда барча рақибларидан устун келган нефть-газ соҳаси вакилларининг “Аланга” жамоаси “Заковат” интеллектуал клубининг тажрибали билимдонларга имкониятни бой бериб қўйди. Шундай бўлсада нефть-газ соҳаси вакилларининг муносиб иштирокини алоҳида қайд этиш жоиз.

Телевизион турнир давомида барча иштирокчиларга Ўзбекистон касаба уюшмалари Федерацияси ҳамда тармоқ касаба уюшмалари Республика Кенгашлари томонидан қимматбаҳо эсдалик совғалари тақдим этилди.

Мазкур телевизион турнир мустақиллик байрами арафасида махсус кўрсатув сифатида эфирга узатилиши мўлжалланган.