10.05.2024. Кимё ва фармацевтика саноати ходимлари касаба уюшмаси Республика кенгашининг “9 май – Хотира ва қадрлаш кунини умумхалқ байрами сифатида кенг нишонлаш бўйича чора-тадбирлар режаси” ижросига кўра Республика кенгаши, тармоқ тизимидаги бошланғич касаба уюшмалари ташкилотлари томонидан қатор тадбирлар ташкил этилди. Жумладан, тармоқ  тизимидаги “Навоийазот” АЖда “Уч авлод учрашуви” доирасида “Қадриятларимиз – бебаҳо бойлигимиз” шиори остида тадбир ташкил этилди. Учрашувда узоқ йиллар давомида соҳада фидокорона меҳнат қилган тажрибали мутахассислар  ёшларга ўзларининг фаолиятлари давомида ўрганган ва амалиётда қўллаган тажрибаларини  мисоллар орқали гапириб бердилар ва ёшларнинг келгуси иш фаолиятлари учун қимматли тавсияларини бердилар. Cуҳбат давомида фахрийлар фаолиятларининг дастлабки йилларида қийинчиликларга дуч келганликлари ва ёшлар бугунги имкониятлар қадрига етишлари лозимлигини таъкидладилар. Касб фидойилари ёш мутахассислар олдида турган муҳим вазифалар хусусида сўз юритиб, ёшларни қизиқтирган саволларга жавоб бердилар. Тадбир сўнггида фахрийларга корхона касаба уюшмаси қўмитаси томонидан эсдалик совғалари тақдим этилди. Шунингдек, “Махам-Чирчиқ” АЖ, “Фарғонаазот” АЖ, “Деҳқонобод калий заводи” АЖ каби корхоналарда ҳам “Уч авлод учрашувлари” байрамона кайфиятда ташкил этилди.

Тармоқ тизимидаги  корхоналар касаба уюшмаси қўмиталари томонидан  9 май – Хотира ва қадрлаш куни байрами муносабати билан эрта тонгдан Қорақалпоғистон Республикаси ва вилоятлар марказларидаги “Мотамсаро она” монументи пойига гул қўйиш маросимида фаол иштирок этдилар. Жумладан, “Фарғонаазот” АЖ корхонаси раҳбарияти вакиллари ва касаба уюшмаси қўмитаси раиси, касаба уюшмаси фаоллари вилоятнинг хотира майдонига айланган “Ватанпарварлар боғи”га  бориб бошқа идоралар вакиллари қаторида иштирок этдилар Тадбир бошланишида ҳарбий оркестр ижросида “Хотирлаш куйи” янгради. Иккинчи жаҳон урушида ва мустақиллик йилларида эл-юрт тинчлиги йўлида мардларча ҳалок бўлган ўғлонларнинг порлоқ хотираси ёд этилиб “Мотамсаро она” монументи пойига гулчамбар қўйилди.

Байрам муносабати билан тармоқ тизимидаги бошланғич касаба уюшмалари ташкилотлари фаоллари томонидан фахрий ходимлар уйларига борилиб хабар олинди, дилдан суҳбатлашилди ва озиқ-овқат жамланмалари топширилди.

Шавкат Тоиров

Кимё ва фармацевтика саноати ходимлари касаба уюшмаси Республика кенгаши раисининг ёшлар масалалари бўйича маслаҳатчиси