Previous Next

31.08.2022. Давлатимиз раҳбари бошчилигида олиб борилаётган кенг кўламли ислоҳотларда, аввало, инсонни қадрлаш, халқнинг ҳаётдан розилигига эришиш, турмуш фаровонлиги, орзу-мақсадлари рўёбини таъминлашга алоҳида эътибор қаратилмоқда.

Бунда, албатта, ёшлар сиёсати, уларнинг таълим-тарбиясига, келажакда комил инсон бўлиб улғайишларига бўлаётган ғамхўрлик Учунчи Ренессансга пойдевор вазифасини бажараётгани қувонарли ҳолдир.

Янги ўқув йили арафасида ота-оналар фарзандларининг ўқув-қуролию, кийим-бошини янги ўқув йилига ҳозирлаш, дилбандини тенгқурлари орасида ҳеч нарсадан кам бўлмай юриши учун ҳали у бозор, ҳали бу бозорга чопмоқда.

Айни шу кезда Ўзбекистон касаба уюшмалари Федерациясининг Фарғона вилояти Кенгаши ҳамда Ўзбекистон таълим ва фан ходимлари касаба уюшмаси Республика кенгашининг Фарғона вилояти бўйича масъул ташкилотчиси ҳамкорлигида хайрли ишга қўл урилди. Ватанимиз Мустақиллигининг 31 йиллиги байрами муносабати билан ташкил этилган ижтимоий лойиҳа доирасида вилоятнинг туман-шаҳарларида истиқомат қилаётган болажонларга 17 турдаги ўқув-қуроллари ҳамда мактаб сумкалари ҳадя этилди.

Ўзбекистон касаба уюшмалари Федерациясининг Фарғона вилояти Кенгаши раиси Эркинжон Нуралиев ёшлар билан суҳбатлашаркан, уларни мактабда аъло баҳоларга ўқиб, мамлакатимиз тараққиётига муносиб ҳисса қўшадиган ватанпарвар инсонлар бўлиб етишишларига тилак билдирди.

Шундан сўнг ўқувчилар учун Ислом Каримов номидаги вилоят театр-концерт саройига, Фарғона вилояти тарихи ва маданияти Давлат музейига ҳамда Фарғона политехника институтига саёҳатлар уюштирилиб, ушбу масканлар ҳақида ёшларга маълумотлар берилди.

Шунингдек, тадбир иштирокчилари кичик халқа йўли бўйлаб Фарғона шаҳрини айландилар. Унутилмас таассуротларга бой бўлган тадбирда болажонлар ширинликлар билан сийланди.

Шоҳсултон Тўхтаматов