Previous Next

03.09.2026. Термиз шаҳар Жайхун МФЙ фуқароси Жаҳонгир Файзуллаевнинг Ўзбекистон касаба уюшмалари Федерациясининг Сурхондарё вилояти кенгашига қилган мурожаати ижобий ҳал этилди.

Мурожаат моҳияти

Ж.Файзуллаев мурожаатида фойдаланилмаган меҳнат таътиллари учун компенсация пулларини ундириб беришни сўраган эди. Кенгашнинг меҳнат ҳуқуқ инспектори З.Холов мурожаатни ваколати доирасида атрофлича ўрганди.

Аниқланган ҳолат

Ж.Файзуллаев 2024 йил 2 февралдан бошлаб «РСД ПОЧТА» МЧЖда менежер лавозимида ишлаб келган. Меҳнат шартномаси 2026 йил 9 июль куни бекор қилинган. Ходимнинг фойдаланилмаган меҳнат таътиллари 51 кунни ташкил этгани аниқланди.

Ўзбекистон Республикаси Меҳнат кодексининг 234-моддасига кўра, меҳнат шартномаси бекор қилинганда ходимга барча фойдаланилмаган ҳар йилги меҳнат таътиллари учун пулли компенсация тўланиши лозим. Кодекснинг 223 ва 224-моддаларида эса бу компенсация ходимнинг охирги иш йилида ишлаб берган вақтига мутаносиб равишда ҳисоблаб чиқарилиши белгиланган.

Натижа

Ўрганиш жараёнида иш берувчи Ж.Файзуллаевга жами 22 517 645,95 сўм (йигирма икки миллион беш юз ўн етти минг олти юз қирқ беш сўм тўқсон беш тийин) миқдоридаги ҳисоб-китоб пулини тўламагани аниқланди. Иш берувчига ушбу маблағни тўлаб бериш ҳақида расмий кўрсатма киритилди.

Кўрсатма иш берувчи томонидан тўлиқ бажарилиб, Ж.Файзуллаевга тегишли барча маблағ — 22 517 645,95 сўм — тўлиқ тўлаб берилди.

З.Холов

Ўзбекистон касаба уюшмалари Федерациясининг Сурхондарё вилояти кенгаши меҳнат ҳуқуқ инспектори