Click to listen highlighted text!

Инсонга наф келтириш - олий бахт!

(+99871)

252-21-18

Манзил: 100165, Тошкент ш., Бухоро куч., 24 Регламент

2017 йил – Халқ билан мулоқот ва инсон манфаатлари йили

25.01.2017. 2017 йилнинг 25 январь куни Ўзбекистон касаба уюшмалари Федерацияси томонидан “Халқ билан мулоқот ва инсон манфаатлари йили” талабларининг бажарилишида жамоат ташкилотлари ролини ошириш” мавзуида жорий йилнинг 19-21 январь кунлари Самарқанд вилоятида ташкил этилган амалий семинар якуни ҳамда бу борада келгусида олиб бориладиган ишлар тўғрисидаги Матбуот конференцияси ўтказилди.  

Анжуманда журналистлар эътиборига оилалар билан очиқ мулоқотлар ўтказиш, муаммоларни аниқлаш ва уларни бартараф этиш мақсадида мутасадди ташкилотларни жалб этган ҳолда чора-тадбирлар белгилаш, улар ижроси бўйича жамоатчилик назоратини йўлга қўйиш механизмлари ҳамда мазкур тизимни республика миқёсида оммалаштиришга оид  таҳлилий маълумотлар Самарқанд вилоятида ўтказилган 3 кунлик амалий семинар тажрибаси мисолида ҳавола этилди.

Матбуот конференциясида таъкидланганидек, амалий семинар ишида тармоқ ва ҳудудий касаба уюшма ташкилотлари, Хотин-қизлар қўмитаси, Фахрийларнинг ижтимоий фаолиятини қўллаб-қувватлаш жамоат бирлашмаси шаклидаги “Нуроний” жамғармаси, “Маҳалла” хайрия жамоат фонди, “Камолот” ёшлар ижтимоий харакати каби қатор жамоат ташкилотлари ҳамда уларнинг ҳудудий бўлинмалари раҳбар ва мутасаддилари иштирок этдилар.

Мазкур жамоат ташкилотлари мутасаддиларидан иборат таркибда тузилган ишчи гуруҳлари Самарқанд шаҳридаги Фарҳод шаҳарчаси, шунингдек Сартепа мавзеси, Каттақўрғон туманидаги “Мўминхўжа” маҳалла фуқаролар йиғинида яшовчи 1200 га яқин хонадонларда бўлиб, очиқ ва самимий мулоқотлар ўтказдилар. Аҳоли билан мулоқотлар жараёнида мазкур ҳудудларда бандликни таъминлаш, савдо ва хизмат кўрсатиш шахобчаларига етарли даражада тўлов терминалларини ўрнатиш, имтиёзли банк кредитларини ажратиш, ҳудудни ёритиш, ичимлик суви таъминотини ва транспорт қатновини яхшилаш, ички йўлларни таъмирлаш, коммунал ва маиший хизмат соҳаларига тааллуқли камчилик ва муаммолар борлиги аниқланди. Ўрганишлар якунига кўра Касаба уюшмалари ва ҳамкор жамоат ташкилотлари вакилларидан иборат Ишчи гуруҳлари ушбу муаммолар тўғрисидаги таҳлилий маълумотларни ҳудудлардаги мутасаддилар эътиборига ҳавола этиб, уларни бартараф этиш бўйича аниқ муддатли чора-тадбирлар белгиланиши ва ижрога йўналтирилишига эришдилар.

Матбуот анжуманида шунингдек, ишчи гуруҳлари аҳоли билан мулоқотлар давомида аниқланган муаммоларнинг аксарияти маҳаллий даражада ҳал этилиши мумкин бўлган ва оддийгина эътиборсизлик оқибатида келиб чиққанлигининг гувоҳи бўлгани қайд этилди. Жумладан, ҳудудларда китоб дўконлари, савдо шахобчаларининг етишмаслиги, аҳолининг банк томонидан кўрсатиладиган қўшимча хизматлардан хабарсизлиги каби муаммоларга ҳам дуч келингани, оилаларда мавжуд қатор муаммолар мулоқотлар давомидаёқ мутасадди ташкилотлар вакиллари эътиборига ҳавола қилиниб, ижобий ҳал этилгани таъкидланди.

Тадбир ташкилотчилари амалий семинарда асосий эътибор Ўзбекистон Республикаси Президенти томонидан халқ билан мулоқот ва инсон манфаатларини таъминлаш борасида белгиланган вазифалардан келиб чиққан ҳолда жамоат ташкилотлар ҳамкорлигида оддий одамлар, оилалар билан очиқ ва самимий мулоқотлар ўтказиш, аниқланган  муаммоларни бартараф этиш бўйича аниқ чора-тадбирларни белгилаш ва улар ижроси юзасидан жамоатчилик назоратини олиб бориш тизимини йўлга қўйиш масаласига қаратилганини эътироф этдилар. Амалий семинар якунида Ўзбекистон касаба уюшмалари Федерацияси томонидан дастлабки тажриба сифатида Самарқанд вилоятидан бошланган ушбу тизимни республикамизнинг барча ҳудудларида оммалаштириш мақсадга мувофиқлиги, бунда асосий талаб ҳар бир хонадонга кириб бориб, оилаларнинг турмуш фаровонлигини оширишга ҳисса қўшиш эканлиги қайд этилгани, анжуман доирасида Ўзбекистон Касаба уюшмалари Федерацияси, Хотин-қизлар қўмитаси, “Нуроний” жамғармаси, “Маҳалла” хайрия жамоат фонди, “Камолот” ёшлар ижтимоий ҳаракати ўртасида мазкур йўналишда ҳамкорлик меморандуми имзолангани таъкидланди.

Матбуот анжумани якунида журналистлар мавзу бўйича ўзларини қизиқтирган барча саволларга жавоб олдилар.

Ўзбекистон касаба уюшмалари Федерацияси Кенгаши Матбуот хизмати

Click to listen highlighted text!